முழுமுதற் பொருளின் விளக்கம்

 முழுமுதற் பொருளின் விளக்கம் 

ஆடம்பரமான கோபுரங்களும், வானளாவிய விமானங்களும் நிறைந்த கோவில் கலாச்சாரத்திற்கு மத்தியில், எந்த ஆடம்பரமும் விரும்பாத எளிய இறைவன் யார் எனில், அவர் யானை முகமும் மனித உடலும் கொண்டு நாற்புறமும் வீற்றிருக்கும் கணபதியே ஆவார்!

வைர, வைடூரிய ஆபரணங்கள் அணிந்து அருள் பாலிக்கும் தெய்வங்களுக்கு மத்தியில், எருக்கம் பூ மாலையை மகிழ்வோடு ஏற்கும் எம்பெருமான் அவர். பெரிய கூட கோபுரங்களோ, பிரம்மாண்டமான சிலைகளோ அவருக்குத் தேவையில்லை. சிறிது மஞ்சளைப் பிடித்து வைத்து, எருக்கம் பூச் சூடி வழிபட்டாலே நம் இடர்களைக் களைந்துவிடும் எளிய இறைவன் நம் விநாயகர்.

தத்துவ ரீதியாக அவரது உடலமைப்பில் நாம் புரிந்து கொள்ள வேண்டியது என்னவென்றால்—அவரது பெரிய காதுகள் பிறர் சொல்வதைக் கூர்ந்து கேட்க வேண்டும் என்பதையும், சிறிய வாய் தேவைக்கு அதிகமாகப் பேசக் கூடாது என்பதையும் உணர்த்துகின்றன.

ஆனால், இந்த மௌனத்தைக் கடைப்பிடிப்பது மிகக் கடினம்; காரணம், நமது சிந்தனைகள் வேர்விட்டு எங்கெங்கோ பரவக்கூடியவை. வாழ்க்கையில் நிலையற்று ஓடிக்கொண்டே இருக்கும் அந்தச் சிந்தனை என்னும் அரவத்தை (பாம்பை) வயிற்றோடு கட்டி அடக்கி, வாழ்வைச் சீரமைக்க வேண்டும் என்பதை உணர்த்துவதே கணபதியின் திருமேனி அமைப்பாகும்.

நமது இந்து தர்மம் இயற்கையின் ஒவ்வொரு வடிவத்திற்கும் மதிப்பளிக்கிறது. மருந்துத் தாவரமான அருகம்புல்லில் இருந்து, அறிவியல் சோதனைகளுக்குப் பயன்படும் சிறிய எலிகள் வரை அனைத்தையும் இறைவனின் படைப்பாகவே பார்க்கிறது. பிரபஞ்சத்தையே தாங்கும் பிரம்மாண்டமான இறைவன், தன்னைத் தாங்க சிறிய மூசிகனை வாகனமாக ஆட்கொண்டான் என்றால், அது அவன் காட்டும் அன்பின் எல்லை அல்லவா? அத்தனையும் ஏற்றுக்கொள்ளும் இந்த கருணாமூர்த்தி வெறும் இறைவன் மட்டுமல்ல, எல்லாராலும் நேசிக்கப்படும் கொழு கொழு குழந்தையும் கூட!

ஒவ்வொரு கலைக்கும் ஒவ்வொரு தெய்வம் உண்டு. ஆனால், அத்தனை கலைகளுக்கும் முழுமுதற் கடவுள் கணபதியே! அதனால்தான், மகாபாரதத்தை இயற்ற எண்ணிய வியாச முனிவர் பிரம்மாவை நோக்கித் தவம் செய்தபோது, "இதனை எழுத கணநாதனே பொருத்தமானவர்" என பிரம்மா வழிகாட்டுகிறார். வியாசர் சொல்லச் சொல்ல, தம் தந்தத்தையே எழுத்தாணியாக்கி விநாயகர் பாரதத்தை கைப்பட எழுதி முடித்தார்.

இறைவன் தன் சூட்சும விதிகளை மக்களுக்கு விளக்க ஞானிகளையும் ரிஷிகளையும் தோற்றுவிக்கிறான். சிவபெருமானுக்குப் பதினெட்டு சித்தர்களும் நாயன்மார்களும், பெருமாளுக்கு ஆழ்வார்களும் அமைந்தது போல, விநாயகப் பெருமானுக்கு அமையப்பெற்றவர் அவ்வைப்பாட்டி. இன்று தமிழ்நாட்டின் மூலைமுடுக்கெல்லாம், வீதிக்கு வீதி விநாயகர் சிலைகள் அருள் பாலிப்பதற்கு அவ்வையார் இயற்றிய 'விநாயகர் அகவலும்' அவரின் பக்தியுமே முதன்மைக் காரணம்.

விநாயகரை வணங்கும் போது அவ்வையாரையும் நாம் நினைவில் கொள்வது அவசியம். அவரின் அகவல் வரிகளை மனதில் நிறுத்தி நாம் வாழத் தொடங்குவோமேயானால், நம் வாழ்வில் வெற்றிக்கு மேல் வெற்றி குவியும் என்பது திண்ணம்!

ஆசிரியர்